馬主論戰

猪拉多纳

朝東飛駒有冷味

　　呂健威剛啱憑「好友星威」同「時時攞彩」起孖，手風好順，今次一於再吼佢啲馬。睇好第六場「高分貝」，上場贏馬過程猶如斬瓜切菜，繼續跑四班賽唔會有阻力。另外要吼第九場「朝東飛駒」，上場響谷草追得唔錯，轉呂廐後仲未交代，冷冷哋諗得過。

　　第七場「軒轅勇將」亦都分量十足，近兩場贏到冇對手，上到三班跑亦唔會輸蝕，孭輕磅三連捷在望。

張敬山

蘇保羅呼風喚雨

　　除咗下季冇申請牌照嘅黃汝安之外，咁多位練馬師之中，依家只係得蘇保羅未贏夠13W，仲差一場頭馬就上岸嘅佢，肯定搏得就搏，一於吼實蘇廐馬。推介第二場「呼風喚雨」，之前響四班跑近「佳景良駒」上名，身處五班一定有着數，今次用到韋達操刀，已表明心意。另外鍾意尾場「奇葩」，呢隻馬後勁唔簡單，跑咗兩場二班賽適應步速後，話唔定可發威。

任達華

六六駿駒捧得過

　　何澤堯剛啱憑「危險英駿」同「追月」起孖，唔經唔覺今季已經贏咗38場頭馬，成績認真標青，今日一於再捧佢場。

　　推介第六場「六六駿駒」，連續兩場響1400米追近，已經試準晒走勢，今次增程跑1600米應該更加啱追，係時候開齋。另外要留意第九場「太平星」，上場走外叠一樣衝得勁，狀態已經返咗嚟，呢隻馬有班底，隨時掃晒。

寇鴻萍、梁廷鏘