文家良得獎爆駔驍駿駒

猪拉多纳

喺尋日第五場四班千四米，梁家俊騎嗰隻「紅珊瑚」閘前由5倍落到2.7倍大熱，點知跑到半路就跛腳，接近六百萬嘅W飛就咁泡湯，認真慘情。好在俊仔立即收拾心情，之後嗰場即刻靠「駔驍駿駒」打開勝門，殺低埋尋日演出神勇嘅韋達騎嘅「添福駿驥」，功架十足，做咗大師傅之後依然頻頻數胡，值得一讚。
       

至於文家良尋日都可以話係雙喜臨門，未開跑前先喺利達賢手上攞到第九屆最安全及整潔馬房獎，之後又靠「駔驍駿駒」增添進帳，文家良就話呢隻馬質素唔差，但係瘦咗少少，體重得一千磅左右，上鋪仲拚到流鼻血，惟有循序漸進養番好隻馬嘅健康。另外，睇完「駔驍駿駒」今場走勢，文家良仲覺得呢隻馬跑泥地似乎犀利啲，或者之後都會吼實呢啲賽事出擊。