馬主論戰

港陌

伽羅進步食尾胡

　　告東尼剛啱贏咗「勁闖駒」同「喜蓮智星」之後，已累積66場頭馬，繼續響練馬師榜領先，睇嚟今季真係決心要攞冠軍。推介第五場「魔幻大師」，上場初跑谷草即刻贏馬，窄場性能一流，今次吼準木球會錦標再上陣，肯定志不在小。另外推介尾場「伽羅」，連續跑咗六場第三，實力一定有，轉去摩廐後有進步，今次增程應該會出招，就算熱都要捧場。

張敬山

沙紙評分有着數

　　姚本輝今晚手馬幾惡，我睇好佢有馬贏，其中第五場更派出「化工之昇」同「進取」雙龍出海，肯定有圖謀，比較上鍾意前駒多啲，上場閘前落重飛贏馬，證明有人對佢好有信心，今次轉跑谷草一樣啱發揮，隨時添食。另外推介第七場「沙紙」，上場響田草1200米，只係輸畀廐侶「正白旗」唔夠一個馬位，證明依家個分仲有着數，排內檔起步，要贏冇難度。

任達華

南陽望族加罩搏

　　韋達剛啱停賽復出，即刻憑「如願以償」同「川河勁駒」起孖，手風相當順，今晚佢騎足八場，要贏馬冇難度。推介第二場「南陽望族」，今季四戰兩度上名，證明評分有多少着數，唞咗半年先跑今場，賽前做足工夫，加罩上陣可見真章。另外推介第六場「萬里駒」，今季已經五次上名，但始終未能贏馬，今次兼續配韋達兼抽得一檔，應該係贏馬黃金機會。

寇鴻萍、梁廷鏘