馬主論戰

港陌

富貴金龍諗得過

　　蔡約翰今晚又採用精兵制，只係出兩駒咁大把，但我都睇好佢有馬贏，較啱心水係尾場「富貴金龍」，近兩場跑草地賽冇W有Q，但唔好忘記佢係跑泥地起家，今次回師強項，應該可以食尾胡。另一匹心水係第二場「樂融融」，近兩場跑1200米同1400米都入Q，擺明有分響手，轉嚟泥地上陣，照計一樣啱發揮，用到柏寶操刀，點睇都唔似陪跑格局。

張敬山

捧苗廐馬日日中

　　苗禮德剛啱憑新轉倉嘅「金德寶」贏馬捧盃，真係威到盡，今次一於吼實佢手馬。推介第六場「日日中」，近三仗全部跑近，睇嚟四歲馬已經適應晒水土，用到韋達操刀擺明有心求交代，出頭在望。另外鍾意第七場「幸運雄獅」，在港兩場都跑泥地，反映幕後對佢嘅場地性能好有信心，上場亦只係輸畀「大把在手」個半馬位，配合進度隨時可以打開勝門。

任達華

乘奔御風q定掂

　　潘頓剛啱憑「暖在心頭」、「勁力」同「奇葩」中三元兼封王，手風咁順，點可以唔吼佢啲馬？推介頭場「冰火」，前仗單跑一條直路掃低對手，後勁唔簡單；上場留得太後，能夠追近已有交代。今次如果發揮正常，要食頭胡應該唔難。另外鍾意第三場「乘奔御風」，初出已響泥地幾乎贏馬，場地性能唔使懷疑，今次縮程跑1200米排一檔隨時變身。

寇鴻萍、梁廷鏘