馬主論戰

港陌

旺當家再下一城

　　今日第四場姚本輝又嚟馬海戰術，三隻馬之中我最睇好「旺當家」，上場睇住「爪皇盛水」嚟食，而且仲彈甩三、四名馬好遠，點睇都唔係三班留得住嘅馬，今次再跑1200米，對手唔算強，要再贏冇難度。另一匹心水係第七場「太陽海岸」，上場初出兼陣上有些少意外，結果一樣贏得輕鬆，質素有幾高唔使多講，繼續由韋達執韁，穩執多一場頭馬。

張敬山

強駒五班有着數

　　剛啱黎海榮憑「精密紡」、「輕輕鬆鬆」同「開心老友」中三元，搏殺手風好順，我睇好佢今日繼續有馬贏。最啱心水係第四場「寶成智星」，季內贏馬嗰場，蹄下敗將係「爪皇盛水」同「沙紙」，賽事水準好高，回氣兩場後隨時現真身。另外推介頭場「強駒」，季初響四班跑1400米都輸唔遠，依家跑五班賽點會冇着數？安廐爭分籌碼唔多，一定搏得就搏。

任達華

風雲武士咪睇小

　　大摩近期被告東尼追到氣咳，剛戰兩人都冇頭馬進帳，今次大摩屯重兵上陣，睇嚟有心保住一哥地位。推介第七場「風雲武士」，近五場非勝即位，演出準得交關，計作賽經驗豐富過「太陽海岸」，未必冇得跑。另外鍾意第八場「傾力之城」，近兩次跑1400米都以一放到底姿態贏馬，四歲馬依家至真正大熟，馬少場合應該唔難搶放，可取得季內第三捷。

寇鴻萍、梁廷鏘