借題發揮：神州八號實砌 快利多夠銳 東廐馬益晒巫斯義

魑魅魍魉

　　蔡明紹漫長停賽期前，曾協助師父告東尼連中三元，而喺佢停賽嘅日子，並無影響師父嘅出擊大計，點解咁講呢？因暫時嚟睇，3月係呢個馬房單月贏馬次數第二多嘅月份，只係比12月嘅9W，暫時少兩場咋，證明現時又喺搏殺周期之內，所以，蔡仔停賽又點！廐內部分馬已谷咗，冇得等，亦唔使等，咁最大受益者，非巫斯義莫屬。

　　呢對騎練，1隻「締造美麗」其實已夠響夠獎！加上徒弟仔近期冇得跑，令佢哋合作更緊密，好似啱啱周中全泥宴，嘩，熱又贏，冷又有「成就美麗」及「朝東精英」，一向喺泥地夜宴冇咩突出成績嘅告仔，忽然翻幾番，真係估佢唔到，由此推算，3月未完，仍會繼續搏。

　　睇過今期東廐出馬表，配巫斯義嘅唔多，「延續美麗」、「神州八號」及「快利多」，其實隻隻畀人睇實晒，隔夜冇1匹賠率超過5倍，有晒墊底飛，照睇會係呢個馬房今日重點出擊對象。

　　「延續美麗」、「神州八號」及「快利多」3駒之中，前駒仍係處女馬，唔博W，後兩駒就唔同，「神州八號」轉馬房未交代，而近仗跑得最好就係喺巫記手上，呢類師傅馬終於唔係蔡仔騎，脫胎換骨有咩咁意外 ！「快利多」已連贏兩場，銳得很，上番三班，未必即刻打回原形。 

Jack