馬主論戰

猪拉多纳

電訊超星施冷箭

　　今晚我哋隻「電訊超星」有份上陣，呢隻馬上場跑三班1400米都輸唔遠， 今次落番嚟四班跑，對手弱咗一截，用埋何澤堯減磅上陣，照計會有更理想演出，冷冷哋諗得過。

　　另一匹心水係第二場「紅衣叻叻」，蘇保羅今季暫時只係贏得一W，成績欠理想，有惡馬在手一定搏得就搏，呢隻馬上場初跑谷草都入Q，窄場性能唔使擔心，可放心捧場。

聖誕節樂意洋洋

　　聖誕前最後一次賽事，梗係要搵番一、兩隻火雞馬。先吼實尾場「樂意洋洋」，經過上季一輪減分，今季可以響95分低位起步，前仗更響谷草1200 米上名，反映狀態已經返咗嚟，上場沿途走外叠輸咗唔可以作準，今次回師谷草話唔定可以贏番一仗。另外鍾意第七場「雪山神駒」，近兩仗取得一冠一亞，換告廐愛將安國倫操刀，贏得。

有莊有閑諗得過

　　剛啱蔡約翰憑「勁高手」同「勁飛寶」起孖，搏殺手風好順，今晚一於繼續吼實佢手馬。

　　博分頭吼第四場「有莊有閑」，今季四場冇表現，但近兩場唔係遇不利步速， 就係跑到氣管有血，唔可以作準，今次首度轉嚟谷草上陣，話唔定可變身。另外要留第三場「進勝福星」，前仗響谷草1200米輸唔遠，已經試準晒，換潘頓操刀或有唔同演出。