霍利時：智多飛大把世界

魑魅魍魉

自從馬王「爪皇凌雨」光榮引退後，霍利時都好耐未出過任何招牌馬，不過擒日響田草1600米贏馬嘅「智多飛」，霍利時賽後揚言呢匹馬將可成為馬房明日之星。
       
智多飛打疊取勝，霍廐新鎮倉寶成功上位。
終極目標下季打吡

雖然呢匹上季拍賣馬初期表現麻麻，但近兩仗轉程跑1800同1600米，俱見輕鬆贏馬，霍利時表示早已同馬主講過，呢匹係極具質素嘅中長途馬，所以長線部署方面，千祈唔可以太急進，不過今季早嚟咗嘅脫胎換骨表現，難怪令霍利時滿肚密圈，賽後更加同團體嘅成員一致表明將以下一季嘅打吡大賽為終極目標，畢竟後生馬已經連搏兩場，所以霍利時表示今戰後將會安排佢先休息三個禮拜，然後再響三班搵番場1800米復出，力爭三捷。
       

以大馬主蕭百君及其家族為骨幹的06/07霍利時練馬師團體，呢路人馬今季旺氣逼人，同廐嘅「奔騰飛駒」同「智多飛」，已經執咗3W，仲有養響大摩度嘅高價貨「魔法幻影」亦已贏馬捧盃，睇嚟蕭家今季仲有大把機會響凱旋門露面。