高清睇跑馬：勁飛寶人強馬壯

港陌

　　「包裝選擇」今季於總場次92初出跑田草1400米，結果身肥照贏，接戰轉跑1600米排劣檔兼步速慢，但仍力拼得季並壓倒「一言為定」確了不起。上仗跟後駒再次對壘，路程由1600變1800米，「一言為定」贏個多身位，「包裝選擇」看似被技術性擊退，但有兩點要留意，就是「包裝選擇」賽前失左前蹄蹄鐵須重新釘甲，或多或少情緒會受影響；第二是排十三檔形勢麻麻，去到二百五十米更一度被阻，最後所負不遠乃情有可原。今仗強手已去，大摩更是大軍壓境，此駒續配白德民力足補中。

　　「勁飛寶」上仗於總場次155初出，做足準備下敗於「甜將」頸位跑第二，但被彈甩的季軍「錢照贏」接戰補中，可見「勁飛寶」此席亞軍水準高。該役牠雖一早進佔好位，入直路時亦很快望空，但要留意去到彎尾時，鞍上人楊明綸已作推騎，入直路後更積極打鞭，可惜馬匹初時反應平平，直至最後一百米先交出凌厲追勁，你可以話牌仔騎唔起，亦可能是1200米嫌短。今仗改攻1400米絕對明智，改配韋達可謂人強馬壯，再遇「甜將」有力一雪前恥。

Sam