馬主論戰

港陌

至尊飛飛諗得過

　　今日係我一位好朋友嘅生日，佢就係華麗、卓越嘅Christina Lee（師姐），先響度祝佢生日快樂 ！其實師姐係「至尊飛飛」嘅馬主團體成員，呢隻馬今晚有份上陣，若然憑住師姐嘅旺氣贏埋，咁就最開心，同場對手應該係「錢照贏」同「活力至寶」一對馬。

　　其餘心水，「雪山神駒」跑谷草一哩耍家；「萬里駒」轉葉廐後未交代，都係值得留意嘅馬。

張敬山

係時候食勁辣椒

　　近期葉楚航搏殺手風轉順，剛戰就憑「連利精英」贏馬，吼實呢個倉應該冇錯。推介頭場「勁辣椒」，上季首仗可以同「傾力之城」串Q，而壓倒季軍「傳奇快車」，依家落到五班跑，優勢如何唔使多講。四歲馬做足工夫跑今場，係時候贏馬交代。另一匹葉廐馬要留意「闊袍大袖」，季內兩戰非冠即亞，演出夠晒穩定，回配韋達不勝無歸。

任達華

夢幻組合重遊勝路

　　我哋隻「鐳射槍」今晚有份上陣，呢隻馬上場跑谷草1800米輸唔遠，今次增程跑2200米，希望有更佳演出喇！

　　講番心水，鍾意第六場「夢幻組合」，上季尾初跑谷草，即刻響1650米贏馬，當時蹄下敗將仲包括「愛跑得」，賽績一啲都唔簡單， 今次重遊勝路，必打硬仗。另一匹東廐馬吼「飛快威」，上場小試牛刀都跑第三，換蔡明紹操刀隨時贏得。

寇鴻萍、梁廷鏘