大師鐵三角再現

猪拉多纳

雅治、告東尼同埋高雅志呢個曾經靠「精英大師」吒咤馬壇嘅鐵三角，尋日喺馬場再現光芒。不過，今次嘅主角就係同主嘅「魔幻大師」，呢隻馬今鋪初次喺高雅志胯下一放到底，幫佢攞今次客串首Ｗ，零舍有意義。值得一提，呢個南非老將雖然離開咗香港一段時間，但係一出場喺沙圈就有馬迷向佢喝采，證明佢依家一樣受歡迎。
       
高雅志再一次着住「精英」綵衣贏馬。
施雅治愛駒一Ｑ返

另外，呢場馬對施雅治嚟講亦意義重大，事關佢又係跑第二嗰隻「競駿寶寶」馬主競駿會主要成員之一，今勻順利包Ｑ，難怪佢喜極而泣啦（圓圖）。至於「魔幻大師」，施雅治話最開心見到愛駒咁有鬥心，就算一度畀「競駿寶寶」追過，都要fight back贏番，證明佢無揀錯馬，佢仲話愛駒可以再跑長啲，遲啲千六至千八都冇問題。