借題發揮：高雅志客串火速叫胡 魔幻大師非等閑

港陌

　　南非好手高雅志，由今期開始，在港客串1個月，首日已有8駒上陣，與同是第1天上陣嘅郭能，胯下僅得1駒，嚟個好強烈嘅對比，當然，志叔喺香港咁多年，郭能點叻都好，人脈上唔會同志叔有得揮，咁樣比較係唔公平，話時話阿郭係騎得之人，希望繼安國倫之後，佢可以快啲企得穩。

　　講番今期志叔，首日坐騎牌面幾好，「火箭人」已經係叫胡馬，雖然由主場變作客，點講都係匹不可多得嘅良駒，出道咁耐未甩過Q，喺本土跑草膠地如是，去到杜拜亦都係，而佢屈居人後嗰3場，夾埋輸唔到1個身位，總之，跑得出力鬥「蓮華生輝」水準，邊隻馬都要敬畏佢三分。

　　至於其他場次，頭場「有莊有閑」、第五場「魔幻大師」係唔錯選擇，前駒上季一出贏1400米，蹄下敗將係「芙蓉威龍」，四班唔會困得住，雖然上場同程斷得快，有機會係發揮有誤所致，總之重磅都要用大師傅，咪當完全冇機會。後駒終於肯加程，加上「大師」系之馬落入志叔手上，單單係情意結，已值得捧場。

Jack