鳳凰阿聯新年夠細心

猪拉多纳

今午有2場澳職新年快車，頭場榜尾大戰，威靈頓鳳凰主場對阿德萊德聯值得留意；鳳凰仍有中場主力麥堅治未好番，今季主場出擊戰績亦唔標青，不過阿德萊德聯亦近況欠佳，海軍鬥水兵格局，唔慌多波入喇，一於捧中位數2.5球2.13倍入球細。

（周日下午2時35分開賽）

阿德萊德聯現時喺積分榜墊底，威靈頓鳳凰亦唔好得幾多，只係比「阿聯」多5分，今仗雖有主場之利，可惜悍將麥堅治膝傷未愈，今仗唔使預佢，對攻守有一定影響，唔計中立場及連盃賽在內，今季4次主場出擊只得1勝3負，唔多信得過喎。不過阿德萊德聯近況曳到爆，之前8仗聯賽竟得1勝2和5負劣績，見到都唔開胃，今仗仲有佐敦艾斯及拉利麥基爾等主力因傷倦勤，想作客偷雞都唔易，睇番「阿聯」今季6場聯賽作客，入得4球咁大把，就算想搶攻亦有心無力，捧入球細（2.5球）穩陣。
流浪者恰慣光輝

尾場西悉尼流浪者主場對珀斯光輝，珀軍主力守將祖碧治仲要坐波監，令防守力受削，今季佢哋喺聯賽已失咗26粒，屬其中一支失波最多球隊，今仗冇埋祖碧治更係雪上加霜；西悉尼流浪者雖有射手辛達利比停賽，但近6次主場對珀斯光輝，錄得5勝1負佳績，明顯格食格，今仗有力贏波擸晒3分，主勝有1.6倍不容錯過。

（周日下午4時50分開賽）