賓菲加炒起費利拿

猪拉多纳

2016主場煞科攞尾彩

葡超仍在歇冬，但仲有葡萄牙聯賽盃分組賽上演，其中D組賽事上屆冠軍賓菲加首度上陣，主場對實力一般嘅費利拿。由於賽事採取單循環制，換言之每組4支球隊只會踢3場比賽，而且只有小組首名球隊可獲出線，因此每場都係生死戰，相信賓菲加會使出真功夫，今仗炒得起作客5連敗嘅費利拿。賓菲加讓一球，直取讓球主勝。

（周五清晨5時15分開賽，馬會網上文字直播）

葡聯盃可以話係賓菲加嘅「私家盃」，事關佢哋近8屆賽事有7次成功奪冠，包括近3屆嘅獎盃都落入呢支葡超豪門手上，可見賓菲加的確對葡聯盃情有獨鍾，唔會因為「盃仔」而留力。賓菲加陣中除咗有今季於聯賽各自攻入5球嘅大勇射手魯爾占美尼斯、美度古之外，防線上仲有近期人氣急升嘅中堅域陀連迪路夫，事關有指曼聯將於1月收購呢位瑞典國腳，正所謂臨別秋波，被「瑞典呂布」伊巴謙莫域大讚嘅域陀連迪路夫，當然想做齣好戲，為賓菲加於2016年最後1次主場踢出漂亮勝仗。

實力麻麻嘅費利拿排葡超下游，而且表現未見起色，球隊開始感受到降班壓力，以目前形勢當然護級大過天，難以兼顧盃賽爭勝，更何況佢哋近6次作客賓菲加都未威過，有5次更輸2球或以上，睇怕今仗都係凶多吉少。
波圖回勇追得過

至於B組則由另一支葡萄牙班霸波圖主場迎戰費倫斯（周五凌晨3時15分開賽，馬會網上文字直播），波圖已擺脫早前5連和悶局，近5仗全勝重拾霸氣，包括聯賽作客大炒費倫斯4比0，今仗有地利之助，可望再炒多費倫斯一鋪，波圖讓兩球都要讓球主勝。C組布拉加近10次主場8勝，絕對係葡超地頭蟲，加上近5次主場對里奧艾維，取得4勝1和不敗佳績，數據非常靚仔，主勝相信冇走雞。

（周五凌晨3時30分開賽）