皇蘇主場恰死地上最強

猪拉多纳

巴塞隆拿被譽為「地上最強」，唔好講西甲稱霸多年，就算喺歐洲都少有對手，不過今晚佢哋將要造訪近年最大噩夢──皇家蘇斯達主場！巴塞隆拿近7次作客皇家蘇斯達竟然未嘗1勝，當中輸咗5場咁多，今仗作客皇家蘇斯達冇讓波把握，皇蘇讓球主勝好值博。

（Now 632周一凌晨3時45分直播）
巴塞近7次到訪2和5負

巴塞隆拿由哥迪奧拿、維蘭路華、馬天奴到安歷基年代，一直都係西甲班霸，強如皇家馬德里同馬德里體育會，面對「地上最強」都係輸多贏少，唯獨多年來作客皇家蘇斯達，巴塞就一面倒處於下風，當中近6季西甲作客1和5負，盃賽亦有1次和波紀錄，皇家蘇斯達主場堪稱係巴塞頭號凶地。

事實上，巴塞隆拿今季表現欠缺霸氣，上仗聯賽就喺主場畀馬拉加悶和0比0，今季已先後喺艾拉維斯、切爾達等中、下游球隊身上失分，今仗喺恩尼斯達、烏姆迪迪及馬菲奧等球員受傷下，面對剋星實難有必勝把握。

主場出擊嘅皇家蘇斯達今季演出可人，目前成績甚至壓倒馬德里體育會排前列位置，有機會爭奪來屆歐聯資格，佢哋喺聯賽已經踢出4連勝走勢，而且4仗都係以2球或以上比數清脆贏波，韋利安荷西同卡路士韋拿一對攻擊組合狀態十足，主場受讓極之抵玩。