阿仙奴破門做老大

猪拉多纳

「次名宿命」避之則吉

今晚歐聯A組兩大豪門對決，阿仙奴主場迎戰巴黎聖日耳門（PSG），兩隊現時同分兼一齊奪得出線席位，但兩軍都想以首名出線，咁樣對進入淘汰賽抽籤比較有利。特別係阿仙奴吸取過去4屆都以次名晉級，搞到16強碰上巴塞等一級勁旅即被淘汰嘅教訓後，今屆必定力爭小組「一哥」。以兵工廠近8仗主場6勝2和嘅強勢，小讓平半上盤博得過。

（有線61及201台周四凌晨3時45分直播）
首名出線避開強敵

阿仙奴同聖日耳門喺A組超晒班，現時同得10分，拋離盧多格德斯及巴素利9分，非常誇張。不過唔好以為今仗屬例行公事，因為一旦以次名出線，16強抽籤時就要面對其他組別嘅首名勁旅，無疑比較惡踢。阿仙奴近4屆都以次名出線，結果16強兩遇德甲班霸拜仁慕尼黑，近兩屆則惡鬥巴塞隆拿及摩納哥，最終兵工廠悉數被淘汰出局。「次名必死」宿命影響下，領隊雲格今屆點都要爭番個小組一哥位，避免重蹈覆轍。

由於阿仙奴首循環作客打和聖日耳門1比1，換言之今仗返到主場，只要贏波就可以領先對手3分，加上對賽成績佔優下，即時鎖定首名出線資格，必定搏到盡。兵工廠上仗英超臨尾憑基奧特一個頭槌逼和曼聯，士氣得以保持，加上連盃賽在內，佢哋近8次主場錄得6勝2和，共入19球。若單計歐聯兩次主場出擊，全勝之餘更狂轟8球，禾確特及奧斯爾各有3球進帳，火力強勁，足以撕開聖日耳門防線。
PSG訪英成績唔標青

至於聖日耳門近況都唔差，但關鍵時刻往往缺少1位可以一錘定音嘅射手，卡雲尼首輪對阿仙奴雖然極速入波，但之後屢誤戎機，埋下最終被逼和1比1嘅伏線，而且近4次歐聯造訪英超球隊，只獲1勝1和2負，唔算標青，今仗作客爭勝決心勁大嘅阿仙奴，好難全身而退。