英足盃復仇愛華頓 曼聯弗爆搶W

猪拉多纳

講到今晚矚目大戰，梗係愛華頓同曼聯會師溫布萊嘅英格蘭足總盃4強！兩軍對上嗰次喺英足盃交手，已經係2009年嘅事，當時拖肥糖喺互射12碼階段擊敗紅魔鬼躋身決賽。但睇番佢哋近兩次喺英超碰頭，曼聯都能夠喺保持不失下贏波唔在講，紅魔近排亦狀態大勇，近6戰足足贏咗5場，相信今晚實會趁勢報仇，將愛華頓踢出局，1.9倍客勝制得過。

（樂視818、819周日凌晨零時15分直播）

曼聯領隊尹戈爾日前喺賽前記者會上，大讚球隊今季成績比上季好。雖然尹帥由上年年尾開始，已經被魔迷鬧爆叫佢落台，但其實睇番曼聯今季成績，聯賽暫列第5位，只落後第4位嘅曼城兩分，仲有機會爭入前四，足總盃亦較上季8強止步走得更遠，成績的確好過上季。
福仔搏盡爭肥約

再講吖，紅魔小將拉舒福特今季為球隊13次上陣斬獲7球，火速成為英超新星。但呢隻當紅炸子雞以冇經理人為由，暫時唔肯同紅魔續約，最近仲有傳佢有更好嘅待遇添。相信「福仔」為咗提高自己嘅身價，今晚一定全力以赴，爭取入波！

至於上個月獲伊朗富豪摩舒利入主嘅愛華頓，正所謂新人事新作風，大股東摩舒利講明如果拖肥糖今季拎唔到任何一個錦標，領隊馬天尼斯下季就冇得留低。可惜拖肥糖依家喺聯賽排第11位，英聯盃又被曼城淘汰，剩番英足盃有得爭，但撞正對手係同樣需要踢爭氣波嘅曼聯，贏波難度都幾大。
愛華頓鋒線啞火

更何況拖肥糖最近表現大跌Watt，連續6場比賽未贏過，當中有4場更係交白卷，但就失咗9球咁多，進攻可以話毫無板斧，喺中立場踢又冇埋地利，曼聯1.9倍客勝絕對係信心之選。