伯頓主場特醒 奧咸有難

猪拉多纳

今晚有3場英甲上演，阿King揀咗伯頓對奧咸同大家研究。伯頓今季初登英甲，表現已令球迷擊節讚賞，現時更位居榜首，球隊主場只係輸過兩場聯賽，可見佢哋喺自己地頭格外醒神。伯頓今仗雖然有剛由英冠諾定咸森林外借加盟嘅前鋒泰萊獲加要代表英格蘭U20出賽而缺陣，但其他位置未有傷停問題，再加上近兩仗入3球嘅中場馬克杜菲腳風甚順，今仗有力攻破對手大門。

奧咸近況反覆，最近5場波錄得1勝2和2負，現時排喺第22位降班危機深重，但衰在搶分時候偏遇陣容不整，前鋒費艾利同後衞馬迪彭馬因外借條例不能倒戈，另一後衞雲徹斯特要代表北愛國家隊出賽而缺陣，兵源大受削弱下加上作客，相信難以抵擋到伯頓，阿King捧1.63倍主W。

（TVB 301周六晚上8時30分直播）
睇好巴拉福特車士打菲特

另外兩場英甲，米禾爾近期作客雖多場保持不敗，但對手都係中下游球隊，含金量唔夠，今次作客鬥主場兩連勝嘅巴拉福特應該冇運行，平手盤揀巴拉福特。

（TVB 301周六晚11時直播）

最後一場，狀態平穩嘅車士打菲特迎戰於聯賽遭逢3連敗的費列活特，主場夠贏，平手盤撐車軍。

（周六晚11時開賽）