廣島撻番着客Ｗ抵博

猪拉多纳

日職今日都有場直播波，由新升班嘅大宮松鼠主場對廣島三箭，你咪睇廣島開咧咁耐踢到一劈嘢咁，今場佢哋個足智彩客Ｗ，前晚居然出現下調，嗰個1.8倍客勝認真抵博，都係驚嘅咪要廣島讓平半個上盤囉，都有1.69倍。

（有線61及201周日下午3:00直播）

廣島今季頭威頭勢，响日超盃贏咗大阪飛腳，畀咗人好大期望，點知跟手5場日職同亞冠盃都不勝，直至上周中至响亞冠主場數泰超隊武里南聯3蛋，3個幾禮拜以嚟第一次贏波，究竟佢哋邊度出咗問題呢？其實問題根源幾似隊中超班霸廣州恒大─狀態未起又冇乜運，事關廣島舊年12月都要踢世冠盃，令到季前備戰時間縮短，班球員休息唔夠，所以有些少谷極都唔上力嘅感覺。
大宮戰術單調易塞死

不過，廣島班人質素始終喺度，陣容同上季比亦冇乜大變，佢哋响3場日職開唔到齋，關鍵就係前鋒狀態未起，例如上星期2:2打和湘南比馬場波，廣島嘅射門係對手嘅4倍，多達21次咁得人驚，只要淺野拓磨、佐藤壽人、彼得烏達卡踢番出對武里南聯嘅表現，應該有條件贏到大宮，足智彩個廣島客Ｗ前晚由1.82倍下調到1.8倍，絕對唔會冇原因。

對手大宮剛啱相反，開咧連贏兩場，到上星期作客大阪飛腳至輸波，演出令人有啲驚喜。但係呢班波主要打穩守突擊，而且靠晒塞爾維亞前鋒美迪查搵食，條路比較容易畀廣島塞死，所以作客嘅廣島可以話坐和望贏，就算佐藤壽人左腳尾趾有傷，仲未知出唔出得，依然夠晒本錢小勝對手。