施丹皮里茲暗戰挫士氣 皇馬細心拆彭

猪拉多纳

今輪西甲皇家馬德里作客拉斯彭馬斯，有傳「銀河艦隊」主帥施丹同會長皮里茲於今夏買人方面有分歧，勢必影響軍心，而且佢哋逢歐聯過後都疲態畢露，對上3仗踢完歐聯後嘅聯賽全開入球細，咁啱皇馬剛周中歐聯同羅馬惡鬥，唔攰就假，拉斯彭馬斯為搶分護級必定死守，大細中位數調至3.5球，細盤更值博。

（now 632周一凌晨3時30分直播）
拉斯彭馬斯主場夠韌

有傳皇馬嘅買人禁令快將獲得緩刑，主帥施丹梗係大把大計喇，佢一直都對車仔中場夏薩特及祖記中場保羅普巴流口水，但會長皮里茲唔鍾意狀態飄忽嘅「夏神」，佢老人家想買曼聯門將迪基亞及多蒙特前鋒奧巴美揚，不過施丹堅持留用依家首席門神基羅拿華斯。眾所周知喺皇馬都係「阿皮」話晒事喇，施丹同佢分歧咁大，你話對軍心冇影響就呃人喇。

皇馬上周中喺歐聯16強次回合再贏羅馬2比0，兩回合計贏4比0順利晉級8強，但其實過程唔算輕鬆，羅馬多次反擊都令佢哋抹一把汗。翻查紀錄，皇馬之前3次踢完歐聯，返回聯賽只錄得1勝1和1負，而且全部均屬作客兼開入球細，證明歐聯對眾將嘅體能消耗唔少，立即再戰聯賽，未必咁快回到氣。

另一邊廂，拉斯彭馬斯聯賽3連勝，擺脫之前5戰4敗頹勢，升上第15位護級重現曙光，士氣大振，佢哋上個月曾喺主場僅負巴塞隆拿1比2，有一定頑抗能力，今鬥皇馬必做好防守。況且皇馬近5仗作客4度開細盤，睇得出佢哋客場進攻唔似得喺主場般行雲流水，撞正一心死守嘅拉斯彭馬斯，相信好難予取予攜，既然大細中位數調至3.5球，一於揀細盤。