巴塞齊腳爆基

猪拉多纳

歐聯前夕豪門串燒壯行色

今晚好波連場，阿King特別留意3大勁旅：巴塞隆拿、馬德里體育會、拜仁慕尼黑，事關3隊下周中出戰歐聯16強次回合生死戰，難免會惹起「留力」疑雲。3支豪門處境各有不同，未必一定揸流攤，特別係巴塞隆拿持續大勇，勒都勒唔住，今仗仲有尼馬坐完波監復出，MSN齊腳出擊，主場可大炒基達菲，巴塞讓三球，照捧讓球主勝。

（now 632周六晚11時直播）

巴塞喺歐聯首回合作客2比0擊敗阿仙奴，晉級機會高唱入雲，根本唔需要特別留力下周中主場再鬥兵工廠。事實上，「地上最強」首回合前夕對弱隊拉斯彭馬斯，教練安歷基都派強陣出擊，相信今次亦唔例外。雖然話尼馬近期狀態下滑，但上輪西甲停賽，會方容許佢放假返巴西「叉電」，抖足精神後，今仗應該會交足功課。

至於美斯仲犀利，近4仗轟入8球，加上今季成為陣中首席射手嘅蘇亞雷斯，試問基達菲點招架得住？巴塞上季主場大炒基達菲6蛋，今仗又係時候大開殺戒。
搭馬體會細拖拜仁開大

排西甲第2位嘅馬德里體育會主場對拉科魯尼亞，馬體會就有所顧忌，因為佢哋歐聯16強首回合作客只係同燕豪芬打和0比0，冇乜優勢可言，教練施蒙尼今場聯賽難免會有所保留。拉科今季曾打和馬體會1比1，甚至作客巴塞，都不敗而回，頂得兩嘴，加上馬體會入波能力一向麻麻，寧願揀入球細。

（now 632周日凌晨3時30分直播）

德甲拜仁慕尼黑主場鬥雲達不來梅，拜仁歐聯16強首回合作客同祖雲達斯打和2比2，話晒有兩粒作客入球在手，心都定啲。同埋佢哋聯賽只領先多蒙特5分，仲未可以鬆懈，相信仍會搶攻爭勝。雲達不來梅回勇，近兩仗分別以4比1大勝利華古遜、漢諾威，老將比沙路近3場射入5球，佢今仗倒戈鬥拜仁，當然要畀顏色對方睇，中位數3.5球，捧入球大。

（now 670、有線61及201台周日凌晨1時30分直播）