今日荷甲半場有好路

猪拉多纳

今日搵到兩場荷甲玩半場都好路，先講二哥阿積士作客威廉二世，阿積士同燕豪芬爭冠軍爭到難分難解，不過阿積士較為着數嘅係佢哋歐霸出局，依家專心聯賽，相反燕豪芬仲要兼顧歐聯，阿積士原則上每周一戰，體力充沛，今場對住私房菜威廉二世，半場勝有2.2倍極抵玩。

（now670周日晚9時30分直播）
阿積士半場W抵玩

翻查往績，過去10次兩軍對碰，阿積士有8次都係半場領先威廉二世，擺到明食住對方，而且近3次上半場射入威廉二世大門嘅，都係波蘭前鋒米利克，碰啱呢名射手狀態弗爆，最近兩場對阿爾克馬爾同精英隊，同樣半場已有士哥，今場應該可以幫大家贏錢，半場勝要揀。

另一場阿爾克馬爾主場對精英隊，阿軍踢法大鳴大放，不論對手強弱都喪攻，最近7場荷甲6場開大，呢6場同樣亦開埋「半場大」，加上近年鍾意同精英隊合演「大」騷，近3次對碰都係半場大，再追啦！

（周日晚9時30分開賽）