巴塞客戰伊巴吼「讓和」

猪拉多纳

MSN少咗尼馬火力減

弗到爆燈嘅「地上最強」巴塞隆拿，今晚西甲會作客中游分子伊巴，雖然係實食冇黐牙，但呢支「一哥」着晒火嘅最強武器「MSN」，今仗少咗個要坐波監嘅尼馬，而且佢哋作客經常勒住唔去盡，加上近兩次交手巴塞都係贏兩粒，讓球主客和「地上最強」咁啱要讓二球，不妨捧有分頭嘅讓球和。

（now 632周日晚11時直播）

由美斯、蘇亞雷斯、尼馬組成嘅「MSN」鋒線癲到冇朋友，自2014年10月起，一共轟入200粒（美斯82球、蘇亞雷斯66球、尼馬52球），可謂操控巴塞贏輸關鍵。單計今季聯賽巴塞所入嘅74球，「MSN」就包辦當中嘅62球，非常驚人，再睇落啲，球隊聯賽入波第4多嘅拿傑迪錫，只係入得4粒咁大把。咁啱得咁蹺，尼馬今仗要坐波監，預計會由蒙尼亞艾哈達迪頂上，「MSN」少咁1件落場，巴塞都咪話唔擇使。
賽程密安歷基玩輪換

巴塞雖然火力強勁，但主客場賽事表現有明顯差別，佢哋喺聯賽主場攻入48球，作客只得26球，少咗接近一半，明顯佢哋喺作客環境只會以3分為重，唔會妄開殺戒，以近6仗客場比賽為例，無論入球大細中位數係2.5或3.5球，開出4細2大。況且巴塞賽程頻密，多次出現一周雙賽，更令主帥安歷基有所顧忌，相信會繼續採用輪換制度，力保一眾主力體能至季尾，亦對演出有一定影響。

伊巴防守唔算曳，上周中聯賽快車作客只以0比1僅敗予西維爾，之前佢哋喺聯賽主場迎戰皇馬及馬體會兩大勁旅，均同樣只以2球之差落敗，證明伊巴每逢遇強都頂得兩嘴。今仗伊巴迎戰作客勒住兼有尼馬停賽嘅巴塞，相信會防守行先難大敗，讓球主客和巴塞要讓二球，不妨敲有4.1倍嘅讓球和。