拿玻里同AC大駁火

猪拉多纳

今輪意甲壓軸好戲，拿玻里主場對AC米蘭，拿玻里恨捧意甲恨到發燒，上仗歐霸盃正選陣容，竟然收起兩位射手希古恩、恩斯治尼，可見佢哋以爭奪聯賽為頭號目標，今仗勢必如破柙猛虎撳住攻。不過，AC米蘭亦已回勇，前鋒卡路士巴卡弗爆，今仗同希古恩大鬥射術，可望上演入球騷，最好捧大。

（TVB 301周二凌晨4時直播）

拿玻里上輪意甲被祖雲達斯絕殺，兼失去榜首之位，教練沙利背城借一，上周中歐霸盃32強首回合，將兩位今季入波最多嘅主將希古恩、恩斯治尼放喺後備席休息，最後半個鐘先至上陣，最終輸0比1，但次回合仲有得追，情況未算太壞，最重要係保留體力，返去聯賽搏殺。
贏即返上榜首戰意十足

好消息係祖雲達斯剛於聯賽失分，拿玻里今仗只需全取3分，就可以重奪榜首，戰意肯定高。特別係經過連續2場作客輸波後，返回主場求勝餓渴感更強烈，必然搏盡搶攻。

AC米蘭近6場聯賽取得4勝2和，包括擊敗兩支勁敵費倫天拿、國際米蘭。前鋒卡路士巴卡喺呢6場意甲，共轟入5球，佢今季已有13球進帳。中場本田圭佑上仗亦開齋，全隊愈踢愈有信心，作客都唔怕同對手駁火。事實上，AC已收窄同前3位球隊積分距離，重燃參加下屆歐聯嘅希望，爭勝鬥心不亞於拿玻里，預料雙方將會大激鬥。