曼城唔掂捧車仔主W

猪拉多纳

英格蘭足總盃16強重頭戲，車路士主場惡戰曼城，今仗勝負關鍵在雙方領隊心態，車仔主帥希丁克做「替工」夠專業，7年前正係以看守領隊身份率領車路士奪得英足盃冠軍，留下美好回憶。反觀，曼城落實下季由哥迪奧拿執教後，比歷連尼立即Hea教，連輸2場聯賽大戰，令人懷疑佢想向球會報復，依家內部軍心不穩，兼傷兵滿營，將以副選出擊，受讓制唔過，捧車路士主勝。

（周一凌晨零時開賽）
聯賽無得爭 搶盃仲實際

雖然話希丁克接替莫連奴教「車」後，成績只係中規中矩，但起碼鬥傳統勁旅曼聯、阿仙奴，都唔使輸。直至上周中歐聯先至不敵巴黎聖日耳門，接手後首嘗敗績，其實該仗車仔表現唔錯。事實上，希丁克同球會老闆阿布拉莫域私交甚篤，就算做「替工」，都會落力幫手，既然英超衞冕無望、歐聯爭標路又難行，因此全力爭取英足盃似乎更加實際，因只要能重溫7年捧盃美夢，已經可以向阿布同球迷交代。前鋒迪亞高哥斯達近3仗入2球，韋利安、柏度洛迪古斯亦重拾射門鞋，攻力有保證，今仗要入波唔成問題。

曼城早前宣布下季由哥迪奧拿領軍後，球隊表現即時走樣變形，近兩場英超輸畀爭標勁敵李斯特城同熱刺，已被榜首李斯特城拋離6分。曼城事先張揚換帥確係敗筆，因為會嚴重削弱比歷連尼威望，班球星仲點會聽佢支笛。比帥亦可能抱住做又三十六，唔做又三十六嘅態度Hea住領軍，非常影響士氣。
傷兵多唔夠腳 焗出副選

加上曼城現時傷兵問題嚴重，比歷連尼透露常規軍之中，今仗只有13位「健康」球員可用，要搵青年軍戥腳，人腳非常緊絀。球隊將下周中出戰歐聯16強首回合作客基輔戴拿模，英足盃或會「讓路」，估計會多派副選比賽。值得留意，曼城今季整體成績好過車路士一大截，但今場仲有得受讓半一，邊有咁着數，睇嚟必有原因，捧車仔主勝點都穩陣啲。