拉科華奴搞大龍鳳

猪拉多纳

防線紙紮惟有搶攻

今晚西甲2條紙紮防線互撼，由連續6場都有失波嘅拉科魯尼亞，主場迎戰聯賽作客失球數字最多嘅華歷簡奴。淨係睇雙方防線表現咁曳，都知場波唔慌少士哥，更何況呢兩隊波各有鋒將回勇，一於博1.85倍入球大喇。

（now632台周二凌晨3:30直播）
拉科門將盧斯停賽

「受惠」於後防差勁表現，拉科上仗聯賽主場鬥華倫西亞，就算喺大部分時間領先對手，依然被對方射手尼格度完場前絕殺，搞到打和1:1，錄得7仗不勝紀錄。更大鑊嘅係，門將盧斯要坐波監，拉科今仗好大機會派出今季從未喺聯賽披甲嘅文路把關，防守力進一步削弱。好在首席射手盧卡斯佩雷斯上仗打破入球荒，配合另一箭頭路爾斯阿拔圖攻堅，實會使出渾身解數入波，只好博前面入得多過後面失波嚟搶分。
華歷簡奴失波冠絕西甲

對手華歷簡奴上仗大勝切爾達3:0，中止10場不勝走勢，但唔值得再追，點解？事關呢班波作客失球數字真係慘不忍睹，10場西甲作客勁失29球，場均失守接近3次，計埋主場合共失45球，冠絕西甲，試問仲叫人點捧場。好彩鋒將祖沙比特腳風順，連續2仗有貨交，總算有資格同拉科駁火。既然雙方後防同樣信唔過，入球大仲唔係首選？