巴塞上盤體定嚟食

猪拉多纳

MSN太屈機 讓一粒Easy執

今晚西甲早場爆發榜首大戰，「一哥」巴塞隆拿主場迎戰「二哥」馬德里體育會。馬體會喺13/14球季贏得西甲冠軍，曾經一季之內6鬥巴塞保持不敗，不過自從蘇亞雷斯上季加盟巴塞組成「MSN」組合，馬體會已經再冇呢支歌仔唱。「MSN」喺近5次對賽中，包辦10個入球之中嘅其中9球，助巴塞取後對馬體會嘅5連勝，今場乘對手近況低迷，勢將對賽連勝紀錄增至第6場，巴塞讓一球照捧上盤！

（now 632周六晚11時直播）
馬體會近況曳爆

馬體會過去一周接連受挫，先喺上周末聯賽主場被西維爾悶和0比0，已被少打一場嘅巴塞追至同得48分，優勢盡失；繼而喺周中西班牙盃8強次回合，主場2比3不敵切爾達慘遭淘汰，連同首回合打和0比0，「床單兵團」已連續3場正式賽事未贏過，狀態正陷低潮，呢個時候要硬撼巴塞，整定佢哋唔好彩。

無可否認，馬體會21場聯賽僅失8球，防守係佢哋最大武器，可惜顧得尾顧唔到頭，球隊至今只入30球，莫講與巴塞（52球）及皇馬（58球）相比，就連切爾達、畢爾包及伊巴嘅入球數字都多過佢哋。由於西甲同分先計對賽成績，馬體會首循環主場輸1比2，加上依家打多對手一場，基本上和波都唔掂，今仗真係唔知守好定攻好。
近5次對碰巴塞全勝

不過，就算馬體會一心死守，要抵擋攻力令人聞風喪膽嘅「MSN」組合亦絕對唔易，自蘇亞雷斯上季加盟巴塞之後，巴塞已經連續5次擊敗馬體會，其中巴塞所入嘅10球之中，「MSN」包辦9球，可謂視馬體會後防如無物。

記得今季首循環碰頭，美斯當時有輕傷只做後備，結果最終亦係靠佢後備落場17分鐘攻入奠勝球贏2比1，甚有剋星味道，如今美斯狀態已經返晒嚟，加上尼馬同蘇亞雷斯亦一啲都冇跌Watt，主場出擊有力一舉打沉馬體會嘅聯賽爭標希望。巴塞聯賽連盃賽近17場主場取得16勝1和，其中近12次贏波都能淨勝2球或以上，讓一球屬坐和望贏格局，上盤博得過！