錘仔受讓再扑紅軍

猪拉多纳

聯賽已雙殺 盃賽執多劑

冇錯，話咁快又見到利物浦出場喇，今次係英足盃第4圈，主場對住剋星韋斯咸。紅軍剛喺周中英聯盃4強次回合惡鬥完史篤城，激戰120分鐘，最終射贏12碼進身決賽，3日後又對另一隊豬頭骨韋斯咸，唔單止體力輸蝕勁多，「錘仔幫」今季喺聯賽已經雙殺佢哋，利物浦今場睇嚟又係捱打居多，竟然仲要讓波真係冇理由，一於捧受讓嘅韋斯咸！

（周日凌晨1時30分開賽）
惡戰連場主力踢殘

做得利迷，首先要有個強勁心臟，上場英聯盃睇住利物浦畀史篤城成場撳住嚟砌，史篤城不斷針對紅軍致命弱點，採取高空攻勢，真係嚇到利迷個心仔都離一離。利物浦最終喺法定時間輸0比1其實算好彩，「好運好過好波」，紅軍捱埋加時，終喺互射12碼射贏史篤城出線，不過已經嚇到一眾利迷要狂撳平安鐘，有英媒報道有位叫阿John嘅利迷一邊睇波一邊測心跳，去到12碼階段，其心跳指數就飆升至每分鐘跳118次，咁都冇事，真係唔睇利物浦、唔知身體好！

同史篤城惡戰完120分鐘，3日後又要出戰韋斯咸，今場會係利物浦今個月嘅第9場波，對球員嚟講真係好攞命，要知道紅軍一直有嚴重嘅傷兵問題，今場雖然有中堅洛夫雲傷愈候命，但菲臘比古天奴、奧歷治、史卡迪爾、史杜列治等主力繼續抖，領隊高普焗住要繼續用羅拔圖法明奴、拉爾拉拿、安利簡恩等人，咁踢法真係鐵人都死！
強隊剋星受讓必撑

韋斯咸今季喺主帥比歷改造下變成強隊殺手，並喺打法上完全剋住紅軍，無論係羅渣士定高普，利物浦對住佢哋都冇啖好食，今季英超兩戰「錘仔幫」，喺晏菲路吞完3蛋，今個月初作客烏普頓公園再輸2粒，今場班球員體力上仲係非常輸蝕，憑乜嘢讓波呀？一於捧讓球客勝喇！