漢諾威狂購5鋒博反彈

猪拉多纳

慕遜增兵有Heart繼續追

德甲經過超過一個月歇冬期後，將於明晚（香港時間周六凌晨）重開，不過壟斷過去8屆德甲冠軍嘅3大霸主拜仁慕尼黑、多蒙特同禾夫斯堡，喺歇冬期竟然齊齊有出冇入，慳皮得交關，似乎都滿足於現狀。列強中以慕遜加柏增兵較為積極，至於弱旅中就以漢諾威動作最大，除咗邀得閉關已久嘅前不來梅教頭舒哈夫出山領軍外，仲一口氣增添咗5名攻擊球員，呢兩支球隊明顯有野心喺下半季發圍，值得備忘。

慕遜加柏係列強喺歇冬期最進取球隊，成功撬走多蒙特新星莊拿斯荷夫曼同借得奧甲薩爾斯堡嘅後衞軒特雷加，攻守實力都有改進，佢哋目前雖然只排第4，落後拜仁達17分，但主要原因係季初開得曳，頭5輪輸晒已經畀5連勝嘅拜仁掟甩15分。但自從新帥舒拔上任後，近12輪聯賽取得9勝2和僅1負佳績，比起二哥多蒙特仲攞多咗6分，認真唔簡單，加埋增兵因素，有理由相信慕遜加柏可以喺次循環更上一層樓。

另一支值得備忘球隊，肯定係排緊尾二嘅漢諾威，佢哋上半季戰績低落，主要原因係前線冇一個有把握能力嘅前鋒；歇冬期痛定思痛，搵到「進攻大師」舒哈夫救亡，而且一口氣引入咗施沙拉爾、山口螢、曉高艾美達、艾華科森同馬里奧斯禾夫等5名中前場攻擊手，嚟配合舒哈夫嘅踢法，預期會係次循環一路奇兵，除成績會大幅提升外，仲勢必成為大盤客恩物添！
拜仁贏條街乘機減磅

講番3大霸主，拜仁目前喺德甲積分榜有8分優勢，聯賽冠軍幾成囊中物，但佢哋不但冇增兵，仲一口氣放走3名邊緣球員，季尾一旦面對傷停問題，隨時又會好似近兩季咁難以兼顧3線作戰，會方係唔係諗住留番啲資源畀下季主帥安察洛堤呢？

多蒙特放走咗莊拿斯荷夫曼並冇增兵，皆因佢哋首要目標係集中資源留住陣中嘅星級球員；至於向來富貴嘅禾夫斯堡就將陣中3號中堅添姆高路斯高價賣畀英超諾域治，進一步倚重拜仁來投但表現不穩嘅丹迪，近期頻傳佢哋嘅幕後大水喉福士（大眾汽車）縮皮，似乎空穴來風未必無因喎！