澳洲U23贏默契撞散阿聯酋

猪拉多纳

U23亞洲盃又有冠軍熱門出場，澳洲U23喺D組對阿聯酋U23，2.13倍主W值得捧場。雖然澳洲U23冇派出最強陣容爭標，不過佢哋嘅衝撞型打法，應該恰到左搓右搓嘅阿聯酋U23，而且富咸前鋒阿當泰加特講明同隊友夾到熟，信佢就捧澳洲U23啦！

（now671台周五凌晨0:30直播）
力爭里約奧運入場券

其實澳洲U23有幾個比較有名氣嘅球員，例如拉素中場伊高路美迪斯同利物浦後衞巴特史密夫冇歸隊，不過咁，前鋒阿當泰加特同守將甘馬倫貝基斯踢緊富咸，中場梅斯達化阿米尼又效力過多蒙特，牌面絕對唔弱，加上佢哋喺熱身賽嘅表現對辦，為咗爭前3名攞里約奧運足球賽入場券，冇理由揸流攤。

事實上，阿當泰加特同記者講過好恨入波，而且佢唔覺得，陣容不整唔會造成太大影響，事關佢同大部分隊友由細夾到大，默契超好，相信會有作為。相反，阿聯酋U23陣中，似乎得個艾查捷拉前鋒阿爾阿塔斯似樣啲，而且佢哋玩開嘅地面打法，相信好難攻得入澳洲U23後防，反而好易被對方撞散輸波囉！