紅軍作客難屈機

猪拉多纳

一味打防反 唔識破鐵桶

李斯特城無疑係今季英超最驚喜球隊，不過科娜認為屈福特都搶鏡，呢支升班球隊現時排緊第7位，今晚主場對住近3場不勝嘅利物浦有得砌。紅軍遇弱愈弱，對住主守球隊老鼠拉龜，今場讓唔起弗爆嘅屈福特，捧讓球主勝！　　　　　　

（now 621周日晚9時30分直播）

當占美華迪成為英超風頭躉，其實屈福特前鋒恩哈路都唔差，至今已經有10個聯賽入球，排喺射手榜第4位，呢位尼日利亞射手腳風極順，近3仗都有波入，同後上嘅迪尼合作無間，協助屈福特近3場全勝。恩哈路擁有彈跳力、位置感同埋門把握力，而迪尼唔單止傳送好，力量及頭槌兼備，利物浦好難頂得住佢哋。
屈福特攻守表現佳

利物浦上場對西布朗輸兩球死球，門將米洛列特繼續成為死穴，第一球更係犯下低級錯誤，利迷真係冇眼睇！雖然紅軍今場有馬馬度沙高傷愈復出，頂替上場傷出嘅洛夫雲，但米洛列特把關始終牙煙。

紅軍喺高普上任後先後擊潰車路士同曼城，聯賽盃又大炒修咸頓6比1，呢幾場勝仗都係靠打防反，但對住以守為主嘅中下游球隊就顯得老鼠拉龜，擺明唔識破鐵桶陣，菲臘比古天奴同拉爾拉拿並非突破力強嘅球員，屈福特今場只要做好防守，再伺機進攻，分分鐘贏埋都唔奇，受讓值捧！