沙福特城重賽細不低頭

猪拉多纳

今晚勁多盃賽，阿King睇中一場英格蘭足總盃第2圈重賽，哈特普爾返主場再鬥沙福特城，非聯賽球隊沙福特城雖有加利尼維利等紅魔名宿於幕後撐腰，但只屬烏合之眾兼攻力一般，不過乙組仔哈特普爾亦唔好得幾多，累鬥累格局捧入球細。

（周三凌晨3時45分開賽）

沙福特城只屬非聯賽球隊，但由於有曼聯名宿加利尼維利、菲臘尼維利、傑斯、史高斯及畢特等入股經營，並泊到華倫西亞嘅新加坡老闆林榮福呢個好碼頭「泵水」，加上喺10月尾靠普利一腳「碧咸式」笠射殺入足總盃首圈，忽然受到關注，上次造訪哈特普爾先開紀錄下遭逼和1比1，因此今仗要重賽。可惜呢班波質素有限，尤其係冇乜火力，近5仗僅入6球，唔好因為後台咁猛而高估佢哋。

英乙球隊哈特普爾級數較「沙城」高，但狀態同樣唔掂，之前9仗贏得兩場咁大把，當中輸咗5仗，淪為聯賽尾五，演出慘不忍睹，今仗就算有地利，亦欠缺贏波把握，預計攻力一般嘅「沙城」會穩陣行先，唔慌多波入，細盤乃不二之選。
國米主場對卡利有鑊氣

至於意大利盃國際米蘭主場對乙組仔卡利亞里，「藍黑兵團」今季守強攻弱而為人詬病，好彩近期前鋒莫路伊卡迪重拾射門鞋，「黑山小妖」祖維迪上仗大勝烏甸尼斯4比0之役，更打破3個多月嘅入球荒，相信呢支意甲一哥可大炒卡利亞里。最後葡盃塞圖巴爾主場對里奧艾維，塞軍嘅南韓前鋒石鉉俊近兩仗轟入3球，弗到漏油，撞正進攻大過天嘅里奧艾維，隨時合演入球騷，大盤有計。