FC廣州大騷助興

猪拉多纳

世冠盃今日喺日本大阪上演兩場半準決賽，頭場由中冠盃盟主墨西哥勁旅CF阿美利加鬥FC廣州（廣州恒大淘寶），CF阿美利加近7仗賽事就6仗開入球大，一於博入球大。

（有線61、201台周日下午3時直播）

CF阿美利加踢法好有娛樂性，頻頻大交易，球隊最大名氣球員，必數墨西哥國腳奧利比柏拉達，佢上年以1000萬美元轉會費加盟，成為墨超史上最高身價球員。呢位31歲射手交足功課，上陣58次入22球，佢拍檔卡路士昆特路近期亦腳風好順，上仗墨超季後賽梅開二度，協助球隊以3比1擊敗普馬斯，可惜兩回合計輸波出局。從好方面睇，CF阿美利加可全力爭世冠盃，應會有更佳演出。
CF阿美利加炮手鬥攻

FC廣州擁7名外援，但由於亞冠盃只淮出3人，限制咗球隊表現。不過，世冠盃容許派7個外援上陣，冇份踢亞冠盃嘅羅賓奴、阿倫等今仗可一齊披甲，令FC廣州潛力大爆發，攻力肯定大大提升。美中不足係門將曾誠有傷，好可能缺陣，防線有隱憂，最好捧大盤。另外，日本傳媒《東京體育》爆料，FC廣州班主之一嘅馬雲，旗下集團阿里巴巴E-Auto早前成為世冠盃贊助商後，準備用約250億港元收購英超豪門曼聯，打造足球王國。
三箭夫添撲擊馬贊比

另一場半準決賽，東道主廣島三箭對剛果民主共和國球隊馬贊比，三箭教練森保上仗世冠資格賽畀佐藤壽人等多位主力休息，仍以2比0輕取奧克蘭，眾星今仗歸位，可望再下一城。馬贊比曾於2010年爆冷打入決賽，但非洲球隊水準靠唔住，捧三箭主Ｗ為妙。

（有線64、203台周日晚6時30分直播）