利物浦捱細界 高壓打法露弱點

猪拉多纳

氣勢回落嘅利物浦，今晚英超返主場迎戰「豬頭骨」西布朗。早前狂掃車仔同曼城嘅紅軍，逐漸暴露出其高壓打法嘅弱點，「玻璃腳」史杜列治又再度受傷，令火力進一步受削，撞正作客防守特醒、連續7場作客聯賽開細嘅西布朗，隨時陷於苦戰，細盤不容錯過。

（now 621周一凌晨零時直播）
(日)21 利物浦 vs 西布朗

利物浦自前多蒙特教頭高普接手後漸有起色，之前試過八戰豪奪七勝，包括聯賽作客勇挫勁旅車路士及曼城，令人刮目相看。不過紅軍上仗聯賽喺備受睇好下，意外淨吞紐卡素兩蛋，證明高普嘅高壓快速打法唔係萬能，只要對方先做好防守，唔留畀紅軍太多反擊空間，紅軍即時冇晒計。至於好番冇耐嘅前鋒史杜列治，對完紐卡素後又發現大腿肌肉拉傷，今年提早收爐，另一箭頭賓迪基近況欠佳，進攻核心菲臘比古天奴上周中歐霸對錫永先傷愈復出，狀態明顯未足，短期內未必幫到手。
西布朗作客擅玩死守

西布朗領隊佩尼斯出晒名係護級專家，尤其係客場出擊例必死守。睇番今季西布朗聯賽7次作客，雖然入得4球咁大把，但只係失咗5球，乃英超客場失波最少球隊，而且全部開出入球細，造訪靠反擊搵食嘅利物浦，一定縮晒喺後面減少空間，令紅軍老鼠拉龜冇碇埋手，今仗唔慌多波入，細盤有1.85倍咪嫌少。