莫連奴贏「波」吊命

猪拉多纳

兩件猛將復出幫拖

莫連奴份工凍過冰水，連日嚟都有消息話，未來兩場波將會決定佢嘅生死。今晚歐聯對波圖嘅G組賽事，「藍戰士」和波夠出線，壓力照計冇咁大，加上有泰利復出鎮守後防，亨格比利睇好莫連奴可以「過頭關」吊命，車路士讓平半捧1.72倍上盤。

（有線64、203周四凌晨3:45直播）

車路士今季衰到貼地，上場英超夠膽死喺主場輸埋畀般尼茅夫，英媒話下輪鬥李斯特城嘅戰果，將會決定「寸王」仲有冇得留低。慶幸今仗「藍戰士」和波都夠出線，照計壓力唔算太大會有好發揮，加上隊長泰利同中場拉美利斯都趕及傷愈復出，人腳尚算完整。
波圖表現欠說服力

莫連奴曾經喺2004年帶領波圖贏過歐聯，今仗又會對番昔日同佢有牙齒印嘅卡斯拿斯，呢場波真係大把睇頭。冇錯，波圖近期戰績係唔差，但上仗面對費利拿要出盡九牛二虎之力先反勝，早前造訪唐迪拉亦只係贏得1球，表現似乎冇乜說服力喎！再講，車路士歷來歐戰鬥葡超隊伍總共錄9勝1和2負佳績，主場出擊小讓平半，博得過吖。