寸王續命再擺大巴陣

猪拉多纳

車路士領隊莫連奴正陷炒魷危機，今晚歐聯G組主場對波圖，贏波首名出線固然好，但和波都夠出線，但如不幸輸波出局幾乎食硬無情雞。「寸王」今仗又要泊番部大巴穩守，以不敗為首要目標，而且陣中進攻球員都冇態，今場唔慌多入波，捧細啱數。

（有線64及203台周四凌晨3時45分直播）

車仔上場英超主場爆冷不敵下游球隊般尼茅夫，賽後英媒更大爆老細阿布拉莫域已向莫連奴發出最後通牒，要求今場對波圖及下場英超對李斯特城必勝，否則冇得留低。不過，以車仔今季嘅狀態，今場要贏波圖你估咁易咩！盛傳「寸王」同前鋒迪亞高哥斯達不和，最近兩仗都雪藏佢，寧搵夏薩特打「無鋒陣」嘅單箭頭，後面搵奧斯卡杜斯山度士、韋利安同柏度洛迪古斯做支援，最弊佢哋幾個全部冇態，故即使「寸王」變極都改善唔到球隊攻力。
前鋒冇態目標守和

睇埋G組形勢，波圖同車仔同得10分，第3嘅基輔戴拿模有8分，基輔主場對住弱旅特拉維夫馬卡比應該實食冇黐牙，若然車仔同波圖打和，3隊同得11分，計算3隊嘅對賽成績，基輔將奪首名，車仔就排第2出線，波圖出局。車仔依家首要目標就係出線，同波圖打和都唔緊要，冇攻力就只有做好防守，門神泰拔高圖爾斯已經傷愈回歸，隊長泰利亦復操有望上陣，今場車仔踢番最叻嘅「泊大巴」，細盤咪錯過！