悉尼老鼠拉龜冇優「細」

猪拉多纳

噴射機唔知醜淨識守

澳職今日有場「細」均力敵嘅大戰上演，由FC悉尼主場恭候紐卡素噴射機。上季亞軍FC悉尼近期表現唔多對路，近4場聯賽有3場入唔到波，今場對住只守唔攻嘅紐卡素噴射機，教練史葛米拿講到明會死守求1分，更何況佢哋防線穩健，今場開1.88倍入球細高唱入雲！

（有線64、203周五下午4:40直播）
悉尼近4仗3場冇波入

FC悉尼原本被視為爭標分子，不過近4場聯賽只得3和1負未贏過，聯賽榜不斷被對手爬頭。呢班波最大問題係鋒力曳到爆，射手史美斯狀態低沉唔在講，連高域同荷洛斯高2件新兵又交唔到貨，上個月3場0:0和波對士氣造成打擊，今仗睇怕都好難突然翻生。
噴射機靠撲救王死守

紐卡素噴射機今季經常屯重兵喺後防死守，上一次作客0:0悶和阿德萊德聯，全場竟然連一次射門都冇！不過史葛米拿就好厚面皮話：「我覺得作客拎1分係好成績，球隊朝正確方向發展，每1分都非常寶貴！」言下之意即係今場繼續死守，以1分為目標啦。

事實上噴射機今季作客表現唔錯，3場作客聯賽有2勝1和不敗成績，門將比列基迪係主要原因，佢目前以31次成功撲救成為澳職嘅「撲救王」，以FC悉尼前鋒依家咁曳嘅狀態，想撕破噴射機密集防線都唔易呀。