打比郡「+1」反擊冇牙老虎

猪拉多纳

今晚英冠有場大戰，由榜首嘅侯城主場硬撼「四哥」打比郡，聯賽失波最少嘅侯城今場有暗湧，後防中流砥柱兼隊長戴臣因傷缺陣，遇着勢頭唔錯嘅打比郡，主場讓波制唔過，阿King熱捧1.52倍嘅讓球客勝！

（TVB 301周六凌晨3時45分直播）
侯城防線慌失失

「老虎」侯城上場作客榜下游球隊布里斯托城，以為贏波易過借火，可以將連勝紀錄增加至四場，點知開波三十七分鐘就有戴臣受傷退下火線，兩分鐘後「老虎」即刻先失波，幾經辛苦去到下半場後段終由馬隆尼建功扳平1比1，攞番一分大話夾好彩。賽後證實戴臣要抖一個月，今場肯定落唔到場。喺對布里斯托城之前，侯城連續六仗保持不失，而球隊至今踢咗十七場聯賽僅失九球，不過依家冇咗戴臣，後防一定冇咁穩陣，今場仲要對住排第四嘅打比郡，隨時畀對手偷到雞添！

打比郡雖然花名係「綿羊」，不過今場斷估唔會畀「老虎」撳住嚟砌，球隊近五場贏咗四場，雖然最近作客不敵諾定咸森林，之不過「綿羊」打大戰特別醒神，今季對住米杜士堡、般尼、雷丁呢幾支前列球隊都唔使輸，今場受讓博得過。
里昂蒙彼利埃大駁火

今晚深夜仲有西甲獨腳戲，由利雲特主場對戰貝迪斯，貝迪斯近五作客錄得三勝兩和佳績，今場作客都未驚過，受讓之下讓球客勝有1.7倍，真係有買趁早！

（now 632周六凌晨3時30分直播）另外法甲就有里昂主場迎戰蒙彼利埃，兩軍上季兩循環交手共炮製十二個入球，大家都咁入得，一於捧入球大！

（TVB 302周六凌晨3時30分直播）