法國精銳盡出 搵德國尋仇

猪拉多纳

踢熱身賽講到最有戰意，肯定以法國最可靠，喺巴黎布陣迎戰世界盃冠軍德國，對佢哋嚟講真係非一般熱身賽咁簡單，領隊迪甘斯賽前備戰緊張，當正正式賽事咁踢，有力擊退攞完世盃後懶懶閒兼陣容不整嘅德國，法國讓平半，黑柴撐上盤。

（周六凌晨4時開賽）

法國將於明年主辦歐國盃決賽周，視今仗為正式備戰嘅第一擊，比賽亦安排喺決賽周揭幕場地法國國家體育場上演，面對世盃冠軍意義重大。法國去年喺世盃八強戰就係以0比1輸畀德國出局，當然希望喺主場復仇；領隊迪甘斯近期積極聯絡去年8月退出國家隊嘅拜仁翼鋒列貝利回歸，養緊傷要等下個月至復操嘅列貝利亦有正面回應，若然呢位重量級球星答應出山，對迪甘斯同法國隊都係一支強心針。今仗法國點兵亦相當有誠意，除咗皇馬賓施馬同里昂華布拿缺陣外，基本上人腳好齊，主場出擊戰意可靠。
馬里奧高美斯回歸幫到手？

相反，德國雖然喺外圍賽出線，但表現令捧場客失望，佢哋對近期踢熱身賽亦只係試陣心態，除馬里奧葛斯同馬高列奧斯等主力因傷落選外，領隊勒夫仲畀阿仙奴嘅奧斯爾同皇馬嘅卻奧斯免役。勒夫今次點兵最大話題，係重召30歲嘅比錫達斯高大中鋒馬里奧高美斯回歸，另外巴黎聖日耳門門將奇雲查普同史浩克19歲中場小將利萊辛尼亦首次入選，睇嚟旨在試陣。當中利萊辛尼擁有德國同法國雙國籍，法國足總都努力游說佢選擇代表法國，勒夫揀佢明顯係防止法國搶人，更添法國今場贏德國嘅決心。