磐田遇長崎撐主W

猪拉多纳

誓保次席戰意靠得住

日乙仲剩低3輪賽事，咧住4分嘅大宮松鼠九成機會捧盃升班，冠軍已經毫無懸念，反而畀福岡黃蜂追到氣咳嘅磐田山葉，今日主場贏唔到長崎成功丸嘅話，講唔定連亞軍升班資格都冇埋，焗住佢哋唔搏唔得，1.78倍主勝不妨一試。

家陣「老二」磐田山葉只係Head住福岡2分，假如今日打和長崎，都可能畀作客群馬嘅福岡追到同分，輸埋就更加可能次席不保添，所以唔到磐田唔搏。但係長崎都一樣要搶分，先至可能保住前6名，可以參加升班附加賽，旨望佢哋放軟手腳，根本就係天方夜譚。

既然大家都有搶分嘅必要，就只能夠憑實力說話。由往績去睇，磐田過去3戰長崎取得2勝1和，理論上實食冇黐牙，不過今日佢哋會踢少兩件主力，包括守衞森下俊坐波監，同埋剛剛當選日乙10月之星嘅前鋒保夫萊特養傷，被迫起用森島康仁打單箭頭。嚟自英格蘭嘅保夫萊特，今季响日乙入咗20球，佔咗磐田總入球幾乎三分之一，佢嘅缺陣肯定會影響隊波嘅爭勝能力。
往績支持兼顧細盤

但係磐田都唔係冇晒符弗，事關艾達頓杜斯山度士呢件森巴快馬，後上攻擊力相當唔錯，而且今季佢射門82次就製造咗16個入球，效率仲高過保夫萊特（20球/126射門），所以磐田有條件小勝而回，主勝值得一博，再唔係就玩個1.57倍入球細，因為佢哋3次對碰入球都未試過多過2球。