勝利追殺落難鳳凰

猪拉多纳

澳職今日又有直播陪大家，墨爾本勝利喺主場迎戰威靈頓鳳凰，當然玩2.25倍「讓球主勝」比較穩陣。事關墨爾本勝利進攻火力強勁，大家唔使擔心佢哋冇波入，其次係澳洲足總證實拒絕向威靈頓鳳凰長期發牌，咁大打擊班人仲邊有心機同你搏命先？

（有線64及203周一下午4:30直播）

雖然勝利有老牌射手艾奇湯臣養傷，好彩並冇嚴重影響佢哋嘅入球能力，開季後連盃賽7場有5次單場至少攻入3球，火力唔講得笑。或者大家會話，勝利近期喺聯賽對阿德萊德聯、紐卡素噴射機都冇波入喎，但正因為咁，筆者相信今場佢哋喺主場出戰，會更加落力去爭取士哥，去氹番球迷開心。
鳳凰不獲澳足總長期發牌

另邊廂嘅鳳凰喺聯賽連贏兩場，狀態的確唔錯，弊在佢哋背後其實存在好大隱憂，事關澳洲足總近日證實，唔會長期發牌畀佢哋，意味呢間新西蘭球會前程已蒙上陰影，甚至可能下季就被趕出澳職，就算球員個心想打爭氣波，落到場都好難集中精神比賽啦，正所謂「落難鳳凰不如雞」呀，更何況勝利主場氣勢強勁，睇怕都幾難頂得住囉！