南韓撻着「-1」黎料

猪拉多纳

今晚有多場亞洲區世界盃外圍賽第二圈，阿King推介G組嘅南韓作客黎巴嫩，南韓喺組內兩戰全勝同科威特並排榜首，當中包括上仗主場狂炒老撾8比0，真係戥老撾可憐呀！南韓依家氣勢如虹，黎巴嫩又點夠鬥吖，一於捧讓球客勝！

（周二晚10時開賽，馬會網上文字直播）

南韓近年出產一個又一個星級前鋒，安貞桓、李東國、朴主永，依家就輪到孫興民，呢位今夏以2,190萬鎊（約2.59億港元）轉投英超球隊熱刺嘅23歲射手上場大顯身價，大演帽子戲法助南韓大炒老撾。孫興民有速度有技術，黎巴嫩防守又唔算特別強，今場隨時一個唔覺意又畀孫興民搞散條防線，加埋史雲斯中場奇誠庸、水晶宮翼鋒李青龍、奧格斯堡中場具滋哲等外流主力，南韓嘅實力梗係高過黎巴嫩多多聲，今場只要發揮正常，贏兩球或以上唔難吖！
泰國「細」頂伊拉克

至於較早時間開波嘅F組賽事，泰國主場對伊拉克，雖然泰國世界排名較伊拉克低，但球隊狀態不俗，防守又強，近四場只係失咗一球咁大把，加上伊拉克近四次造訪泰國未嘗一勝，今場捧細好過。

（周二晚8時開賽）

講埋D組印度主場迎戰伊朗，伊朗上場狂數關島六蛋，前鋒阿斯蒙梅開二度腳風甚順，今場應可順利大勝而回，捧讓球客勝。

（周二晚9時30分開賽）