格魯吉亞主場做細界

猪拉多纳

英倫三島喺今屆歐國盃外圍賽都有不俗成績，B組嘅威爾斯力壓比利時暫排榜首，決賽周在望；英格蘭喺E組更係無敵，6戰全勝；蘇格蘭雖同德國、波蘭、愛爾蘭等球隊同處D組，但6戰得11分，排喺第3位，成績都算唔錯，今晚佢哋要作客格魯吉亞，不過格軍並非魚腩，蘇格蘭唔容易輕鬆取勝，建議改捧入球細。

（有線61、64、201及203台周六凌晨零時直播）
蘇格蘭進攻火力弱

蘇格蘭喺D組6戰成績係3勝2和1負，包括小勝愛爾蘭1比0、炒過「冇骨魚腩」直布羅陀6比1，仲有主場贏格魯吉亞1蛋，對球迷算係好有交代，不過蘇格蘭人腳質素始終有限，除咗蘇超外，好多球員都喺英超下游球隊或者英冠打滾，例如効力西布朗嘅中場費查、侯城中場馬隆尼、打比郡前鋒基斯馬田等，前線最有名氣應該係愛華頓嘅賴史密夫，不過佢咁多年嚟為蘇格蘭上陣38次，都只係入咗5球，可見蘇軍嘅攻力認真麻麻！

格魯吉亞喺歐洲勁旅眼中係一支魚腩部隊，不過佢哋並未廢到好似直布羅陀咁場場畀人炒6、7粒，之前喺D組主場對住上年世界盃冠軍德國都只係輸兩粒，對愛爾蘭就輸1比2，今場喺主場迎戰實力唔強、火力更係疲弱嘅蘇格蘭，會被大炒嘅機會微乎甚微，甚至頂得住唔輸波添！