費倫突「維」好時機

猪拉多纳

射手侯馬加薪4倍Ｈigh爆

現代足球乜都講錢，費倫天拿今晚喺意甲主場對維羅納，有機會開2.12倍「讓球主勝」打翻身戰。最近費倫放風準備為射手侯馬加薪4倍續約，話口未完，佢就喺歐霸盃打破入球荒，撞啱維羅納近排防線崩潰，連續3仗不勝嘅費倫喺時候贏番場，為嚟緊周中歐霸盃8強次回合壯行色。

（TVB301周二凌晨2:45直播）

費倫喺意盃4強出局後，佢哋上星期喺歐霸盃8強首回合作客基輔戴拿模，結果憑射手侯馬完場前入波以1:1逼和對手，保住晉級希望。講真吖，侯馬近排狀態認真麻麻，為乜佢突然翻生仲打破入球荒？咪個錢字作怪囉！
侯馬復出即入波

報道話，費倫未來幾個星期會同侯馬續約，年薪將會加到150萬歐元（約1,256萬港元），差唔多等於佢原來人工嘅4倍，即係話佢喺費倫捱咁多年，佢嘅實力終於被肯定，就算前鋒基奧斯比羅斯養傷都唔怕，一於博侯馬狂數胡幫費倫搶分，爭奪下季歐霸盃參賽資格。
維羅納防線穿窿

另邊廂嘅維羅納要搶分護級，最近佢哋有唔少傷兵之餘，後防仲唔知食錯咩藥，作客拉素淨輸兩球都算情有可原，但對住頹到爆嘅切塞納同國際米蘭分別連失3球，真係令人睇到火滾，況且佢哋重返意甲後對費倫3連敗，期間勁失10球，被人大炒有乜咁奇先？