車仔今刺大鑊鳥

猪拉多纳

踩到溫布萊　副偈立晒油

今晚英格蘭聯賽盃決賽上演「倫敦打吡」，車路士同熱刺喺溫布萊球場爭冠軍！車仔近期副偈好似立晒油踩極唔去，經常後勁不繼被對手逼和，甚至要倒輸收場，令捧場客好洩氣。面對曾於年初攻入過佢哋5球嘅熱刺，領隊莫連奴為免重蹈覆徹，今鋪肯定加料防守，加埋射手迪亞高哥斯達死火，實難讓擁有當紅射手哈利卡尼壓陣嘅熱刺半一，捧下盤。

（TVB301周一凌晨零時直播）
中場露缺口 迪哥死埋火

車仔由1月英聯盃4強首回合被利物浦逼和1比1開始，近8場比賽竟有5場喺領先下痛失好局，最離譜係足總盃主場領先甲組仔巴拉福特兩粒，最終倒輸2比4。上仗英超大部分時間領先般尼，埋單又跌兩分，仲有尼曼查馬迪攞紅牌被逐，今場要停賽。由於另一位防中約翰米基爾有傷在身，令車仔中場第一道防線出現重大缺口，防守力受削之餘，亦令中場球員心存憂慮，唔敢壓得太前，影響進攻火力。

事實上，車仔近期攻力麻麻，迪亞高哥斯達自從停賽3場復出後，頓失射門觸覺，另外兩位前鋒雷米、杜奧巴缺態，近兩場都係靠後衞伊雲洛域入波，實在諷刺。由於今仗係一戰定生死，估計領隊莫連奴會以穩陣行先，90分鐘好難贏波。
熱刺棄歐霸 留力砌呢場

熱刺喺上周中嘅歐霸盃將哈利卡尼放喺後備，搞到輸波出局，擺明留力今場終極一戰。為咗證明「放棄」歐霸盃係值得，今仗更加要捧盃。熱刺今季打吡戰演出Sharp醒，對阿仙奴取得1勝1和，仲以5比3擊敗過車仔，當時哈利卡尼轟入兩球，加上基斯甸艾歷臣頻頻有士哥，夠晒火力撕開車仔防線。熱刺喺英超難有作為，對英聯盃爭標欲望比車仔強烈好多，就算90分鐘內贏埋對手都唔出奇，有受讓半一之利，下盤值博。
奧斯卡係溫布萊黑腳？

奧斯卡杜斯山度士將會成為車仔今場嘅「大黑腳」！原來呢位巴西國腳之前3次喺溫布萊球場比賽，所屬球隊都輸1比2，包括2012年奧運男足決賽，當時巴西不敵墨西哥失金。兩年前國際熱身賽，佢為巴西上陣對英格蘭，又喺同一地方輸1比2，前屆足總盃4強為車仔披甲，又係以1比2不敵曼城，你都咪話唔邪門。奧斯卡杜斯山度士今場賽前資料話會正選上陣，真係可以博一博熱刺贏2比1波膽！