費托博翻身 由呢場開始

猪拉多纳

回歸頭炮撞正馬德里打吡

星光熠熠迎「王子」首騷！今晚西班牙盃16強首回合上演矚目首都打吡，由「床單兵團」馬體會坐鎮主場硬撼球星如雲嘅皇馬，前者剛有「王子」費蘭度托利斯回巢，今仗好大機會處子登場，梗係想做番齣好戲，教頭施蒙尼亦堪稱皇馬剋星，啱啱被終止連勝強勢嘅「銀河艦隊」，就算有C朗壓陣都冇運行，馬體會仲有得受讓咁筍，斯維力撐讓球主勝。

（now 632及TVB 13周四凌晨4時直播）
搶士哥報答馬體會

講到新一年西甲熱話，當然係費蘭度托利斯「愛回家」重返母會馬體會，無論喺効力車仔同AC嗰陣踢到幾咁折墮，都未有減少「床單兵團」粉絲對費托嘅愛，呢種猶如家人嘅溫暖感覺，加上主帥施蒙尼對佢無比嘅信任，係以往安察洛堤、莫連奴同恩沙基都畀唔到，成為費托重振雄風嘅原動力。今仗西盃對死敵皇馬，好大機會係佢「回家」後首騷，梗係想開個靚頭贏波威番鋪，報答母會給予重生嘅恩情。

除咗「王子」因素外，由2013年西班牙盃決賽計起，馬體會近九次同皇馬碰頭，90分鐘計拎到三勝四和兩負，證明馬體會教練施蒙尼所採用嘅硬朗戰術，食得住皇馬嘅技術型打法；齋計今季，馬體會係西超盃兩回合計以2比1砌低皇馬，季初喺聯賽首循環作客以2比1贏波，睇得出以基比、佐治高基為首嘅前場瘋狂逼搶，有效地打亂皇馬組織攻勢。
皇馬一逼即散讓唔起

皇馬雖然坐擁C朗、占士洛迪古斯、加里夫巴利等星級戰將，但近期表現開始跌Watt，先喺杜拜挑戰盃慘負AC米蘭，日前喺聯賽作客又以1比2不敵華倫西亞，二十二連勝走勢正式斷纜，難免打擊士氣。而華倫嘅戰術與馬體會如出一轍，始終中場卻奧斯、艾斯高、占士洛迪古斯唔夠硬淨，同成班悍將鬥搶勁蝕底，令前線嘅C朗與賓施馬孤掌難鳴，預計馬體會繼續照辦煮碗瘋搶，瓷器又點夠缸瓦撼呢？「銀河艦隊」未必頂得住，作客仲要讓波純粹名牌效應，馬體會嘅讓球主勝咪錯過。
王子球會士哥全紀錄

効力年份 効力球會 出場(入球)

2015 AC米蘭 10(1)

2011-2015 車路士 172(45)

2007-2011 利物浦 142(81)

2001-2007 馬體會 224(91)