神之子谷閘曝光

猪拉多纳

昨朝快活谷馬場舉行七組試閘，難得天朗氣清又涼快，吸引到唔少台前幕後帶埋家人到場觀看，場面熱鬧，順道歎個靚早餐兼享天倫之樂，一舉數得也。就連現今炙手可熱嘅莫雷拉亦唔執輸，雷神一向好保護家人，甚少讓其曝光，今次都攜同老婆仔女一齊到場趁熱鬧。雷神全情投入試閘工作，太座與手推車內的囡囡在二樓餐廳邊食邊等，而幾歲大的囝囝則在地下欄邊玩耍，期間仲有郭能太太及三位愛兒陪伴一齊，唔慌會悶親。早前雷神就係為咗呢位寶貝仔搵學校問題而煩惱，卒之在各方友好協助下已搵到九龍塘一間國際學校就讀。
       
莫雷拉囝囝（右）與郭能公子玩得相當投契。

出戰杜拜世界盃日的五匹香港代表馬已先後啟程前往阿聯酋，摩廐三駒「軍事出擊」、「多名利」及「綽力之城」前晚從沙田馬場出發，而高廐「事事為王」及姚廐「崇山寶」則於昨晨起程。