蘇偉賢頭場又摘

猪拉多纳

阿Chris蘇偉賢近日做咗頭場殺手，前兩期分別憑「勝利雄心」同「辣得喜」食頭胡，尋日又喺頭場大發神威，憑「金桂飄香」幫體操王子李寧贏馬。賽後阿Chris亦對呢匹馬嘅表現讚不絕口，佢話「金桂飄香」向來冇乜健康問題，不過九月嘅時候就試過因為絞腸痧開刀，阻礙咗小小進度。好彩之後都養番好，試閘表現亦相當唔錯，所以賽前都幾有信心。下次重返四班，會考慮幫佢報千四或者千六路程，孭番輕磅，應該可以應付到。
       
金桂飄香轉投蘇偉賢馬房一出即勝，省靚招牌。
李寧生日最佳禮物

另外，體操王子李寧雖然名下都有幾匹團體馬，但呢位大忙人向來絕少出入馬場。上次贏「光速銀桂」唔見佢蒲頭，今次竟然一家大細入場拉頭馬，場面都咪話唔罕見。原來3月10日就係體操王子正日生辰，尋日順利贏馬，就梗係最好嘅生日禮物啦！