隔晚P勁好精神

猪拉多纳

　　今晚係跑馬地百萬挑戰盃嘅最後一個計分之日，數字上有得爭嘅馬有四匹咁多，分別係「牛精仔」、「喜多盈」「環保戰士」同埋「金滿載」。噚日睇飛，發現呢四匹馬之中，竟然只係得「牛精仔」有強勁票數支持，隔晚個W賣到得2倍，而P仲係1.0，睇嚟信心好大。

　　至於怪飛馬，噚晚發現三匹馬嘅P飛勁到爆（見表），而我最鍾意嘅係尾場「好精神」，所以推介畀大家。呢匹馬今季可以話準得可愛，跑六戰獲兩冠兩亞一季，可能因為全部都係跑泥地嘅關係，所以今次轉跑谷草，隔晚個W即刻無人問津，但係要留意，呢匹馬上季其實贏過谷草1200米，點會唔得？難得有重P飛，當然要跟。

　　騎師王方面，好少見田泰安得3.2倍，要捧。(周仲)