柏寶應珍惜良「駒」

猪拉多纳

　　柏寶重來，由今期開始，客串至季尾，呢位昔日騎師二哥，今次嘅坐騎唔多，兩匹咁大把，來自兩個友好馬房方賀兩廐，1匹係頭場「飛天龍駒」，另1匹係「喜寶駒」，坦白講，算係唔錯。

　　依家馬圈形勢唔同，騎師版圖有變，爭奪地盤何其激烈，淨係被稱之為雷神嘅莫雷拉，1個已經夠響夠獎，再加埋潘頓、停緊賽嘅韋達，仲有田泰安、杜利萊，可謂插針都插唔入，邊可能好似以前咁易搵到支持。

　　再睇吓歐道樂及彭利力，前者近3期賽事，夾埋得6匹馬跑，數目少得可憐，後者剛憑「好易搵」食尾胡，打破贏馬荒，到頭來，今期出馬僅得1匹「一定贏」，跑完第二場已可提早離場。

　　做好自己爭取支持

　　從前嘅柏寶，係好多熱門客嘅恩物，殺完1匹接1匹，好少令人失望，近年就表現大不如前，頭馬數字亦大跌，熱門坐騎經常失靈，二哥地位早已被潘頓頂上，呢次再返嚟，地盤愈來愈少，更加唔易交出好成績。希望佢老哥奮發向上，重現昔日悍將本色，不過，喺未獲得足夠支持之前，最緊要係做好自己，重建外界對佢嘅信心。(Jack)